Մայիսյան արևոտ ու ջերմ այս օրը Հրազդանի Հովսեփ Օրբելու անվան թիվ 13 ավագ դպրոցի բակում սովորականից ավելի բարձր էր հուզմունքի ու ջերմության ալիքը։ Այստեղ հնչեց դպրոցական կյանքի ամենասպասված, միևնույն ժամանակ՝ ամենահուզիչ ու խորհրդանշական ղողանջը՝ «Վերջին զանգը»։ Կրթօջախի բակը ողողված էր ժպիտներով, ծաղիկներով ու արցունքներով. դպրոցը մեծ կյանք ճանապարհեց իր 6 ավարտական դասարանների շրջանավարտներին։

Տարիների վաստակն ու հրաժեշտը մանկության մոլորակին

Տարիներ շարունակ այս պատերի ներսում կերտվել են ոչ միայն գիտելիք ու հմտություններ, այլև ամուր արժեքներ, անդավաճան ընկերություն, անմոռաց հիշողություններ ու մեծ երազանքներ։ Այսօր արդեն երեկվա աշակերտները հրաժեշտ տվեցին իրենց մանկության ամենասիրելի ու անհոգ անկյանը՝ հարազատ կրթօջախին ու սիրելի ուսուցիչներին, ովքեր տարիներ շարունակ եղել են նրանց ուղեկիցն ու փարոսը։

Հանդիսության ամենահուզիչ ու տպավորիչ պահերից մեկը դպրոցի տնօրեն՝ Սոնա Մարկոսյանի խոսքն էր։ Իր մայրական ջերմությամբ, հպարտությամբ ու իմաստուն խրատներով նա դիմեց շրջանավարտներին՝ մաղթելով վստահ քայլերով ընթանալ կյանքի բարդ, բայց հետաքրքիր ճանապարհով՝ երբեք չկորցնելով մարդկային բարձր արժեքներն ու հավատը սեփական ուժերի հանդեպ.

«Այսօր դուք բացում եք ձեր կյանքի նոր ու ամենապատասխանատու էջը։ Թող դպրոցում ստացած գիտելիքն ու դաստիարակությունը միշտ լինեն ձեր ճանապարհի լույսը։ Եղե՛ք ազնիվ, նպատակասլաց ու արժանապատիվ մարդիկ, անսահման սիրե՛ք ձեր հայրենիքն ու միշտ բարձր պահեք ձեր կրթօջախի պատիվը»,- նշեց տնօրենը։

Նպատակասլաց սերունդ՝ պատրաստ մեծ թռիչքների

Այս տարվա շրջանավարտներն առանձնանում են իրենց յուրահատուկ հասունությամբ, նպատակասլացությամբ ու ապագայի հստակ տեսլականով։ Նրանցից շատերն արդեն հստակ գիտեն իրենց անելիքն ու ընտրել են ապագա մասնագիտությունը։

Այդպիսի վառ ու օրինակելի աշակերտներից է 12-րդ տնտեսագիտական 1-ի շրջանավարտ Անահիտ Վարդանյանը։ Իր բարձր առաջադիմությամբ, աշխատասիրությամբ, արդարամիտ ու սկզբունքային բնավորությամբ Անահիտը վաղուց արդեն վայելում է թե՛ ուսուցիչների և թե՛ համադասարանցիների խորին հարգանքն ու գնահատանքը։ Նա նպատակ ունի իր կյանքը կապել իրավագիտության ոլորտի հետ և ձևավորել իր ուղին՝ որպես արդարությանը նվիրված, սկզբունքային ու պրոֆեսիոնալ իրավաբան։ Ու հենց այսպիսի երիտասարդների վստահ հայացքն է հույս ներշնչում, որ մեր վաղվա օրն ավելի հուսալի ձեռքերում է լինելու։

Բարի՛ երթ դեպի լուսավոր ապագա

Տոնական գեղեցիկ միջոցառումն ուղեկցվեց սրտառուչ երաժշտական կատարումներով, հրաժեշտի ավանդական ու նրբագեղ վալսով և, իհարկե, երախտագիտության անկեղծ խոսքերով՝ ուղղված մեծատառով Ուսուցիչներին, ովքեր իրենց հոգուց մի կտոր են դրել յուրաքանչյուր երեխայի մեջ։

«Վերջին զանգը» միայն հրաժեշտ չէ անհոգ մանկությանը. սա հասունության քննություն է և նոր, մեծ ճանապարհի սկիզբ։

«MegaNews»-ի խմբագրակազմը սրտանց շնորհավորում է բոլոր շրջանավարտներին։ Թող ձեր բոլոր նպատակներն ու նվիրական երազանքներն իրականություն դառնան, իսկ ձեր կյանքի ճանապարհը լինի խաղաղ, լուսավոր ու հաղթանակներով լի։

Բարի՛ երթ և կանաչ ճանապարհ, սիրելի՛ շրջանավարտներ։

Մ.Դ. 

«Մեգանյուզ»լրատվական 

22.05.26