«Ազգային միավորում» խորհրդարանական խմբակցության առաջնորդ Մարին Լը Պենը կուսակցական խորհրդակցության արդյունքներով հայտարարել է, որ մասնակցելու է 2027 թվականին Ֆրանսիայում կայանալիք նախագահական ընտրություններին։

«Ես մասնակցելու եմ նախագահական ընտրություններին»,- ասել է նա TF1 հեռուստաալիքի եթերում։

Լը Պենը նաև հայտնել է, որ վճռաբեկ բողոք է ներկայացնելու Փարիզի վերաքննիչ դատարանի որոշման դեմ, ինչը քննության ընթացքում կկասեցնի դատավճռի կատարումը, այդ թվում՝ էլեկտրոնային ապարանջան կրելու պահանջը։ «Այսպիսով, ես կկարողանամ նախընտրական քարոզարշավն անցկացնել առանց էլեկտրոնային ապարանջանի»,- ասել է Լը Պենը։

Հնարավոր ընտրվելու դեպքում «Ազգային միավորում» խորհրդարանական խմբակցության առաջնորդը մտադիր է հանրապետության վարչապետի պաշտոնում նշանակել կուսակցության 30-ամյա նախագահ Ժորդան Բարդելային։

Հուլիսի 7-ին Փարիզի վերաքննիչ դատարանը Լը Պենի՝ ընտրություններին մասնակցելու արգելքի ժամկետը կրճատել է մինչև 15 ամսվա, ինչը փաստացի նշանակում է այդ սահմանափակման չեղարկում։ Բացի այդ, դատարանը մինչև երեք տարի է կրճատել խորհրդարանական օգնականների գործով սահմանված ազատազրկման ժամկետը։ Երկու տարին պայմանական է, իսկ մեկ տարվա ընթացքում Լը Պենը պարտավոր է կրել էլեկտրոնային ապարանջան։