Հայաստանի Հանրապետությունում մեկնարկել է 2026 թվականի ամառային զորակոչը:

Այսօր՝ հուլիսի 2-ին, հայրենիքի հանդեպ իրենց պարտքը կատարելու ճանապարհին առաջին զորակոչիկներին հանդիսավորությամբ ճանապարհեցին նաև Հրազդան համայնքից:

Տեղական զինվորական կոմիսարիատի հարակից տարածքում մթնոլորտը և՛ հուզիչ էր, և՛ հպարտությամբ լեցուն։ Նորակոչիկներին բարի ծառայություն և անփորձանք վերադարձ մաղթելու էին եկել հարազատները, ընկերները, համայնքի ղեկավարությունն ու զինվորականության ներկայացուցիչները:

Մինչ վիճակահանության փուլին և զորամասեր մեկնելուն անցնելը, տեղի ունեցավ հանդիսավոր արարողություն, որի ընթացքում ապագա զինվորներին ողջույնի և քաջալերանքի խոսքեր ուղղեցին ներկա պաշտոնյաները։

Հրազդան համայնքի ղեկավար Սևակ Միքայելյանը, դիմելով տղաներին, ընդգծեց հայրենիքի պաշտպանության գործում նրանց ստանձնած դերի կարևորությունն ու մաղթեց տոկունություն, անպարտելի ոգի և անփորձանք ծառայություն։

Հանդիսավոր միջոցառմանը ներկա էր նաև Հրազդանի տարածքային զինվորական զինկոմիսարի տեղակալ, մայոր Էմին Վարդանյանը։ Նա հորդորեց զորակոչիկներին բարձր պահել հայ զինվորի պատիվը, անվերապահորեն կատարել հրամանատարների հրահանգները և հայրենիքին պատվով ծառայելուց հետո տուն վերադառնալ ավելի հասուն ու արիացած։

«Բանակը յուրաքանչյուր երիտասարդի կյանքում դառնում է տոկունության, ինքնահաստատման և հասունացման կարևորագույն դպրոց։ Այսօր մեր տղաները ստանձնում են ամենապատվաբեր առաքելությունը՝ դառնալու մեր երկրի անվտանգության ու խաղաղության երաշխավորը»,— նշում էին ներկաները:

Հրազդանից հայրենիքի պաշտպանությանը զինվորագրվող երիտասարդների շրջանում տրամադրությունը բարձր էր, մարտական ու գիտակցված։ Ծնողներն իրենց հերթին, հուզմունքը թաքցնելով, հպարտությամբ էին ճանապարհում որդիներին՝ վստահությամբ, որ երկու տարի անց նրանց կդիմավորեն որպես հայրենյաց պատվարժան պաշտպաններ։

Հիշեցնենք, որ ամառային զորակոչի շրջանակներում գործընթացն իրականացվում է սահմանված կարգով և թափանցիկության ապահովմամբ՝ երաշխավորելով յուրաքանչյուր զորակոչիկի իրավունքների պատշաճ պաշտպանությունը:

«Մեգանյուզ» լրատվականը բարի, անվտանգ և խաղաղ ծառայություն է մաղթում մեր բոլոր զինվորներին: Բարով դառնաք ձեր օջախներ, տղանե՛ր:

Մարգարիտա Դավթյան