Այսօր Հրազդան քաղաքում մեկնարկեց պարտադիր զինվորական ծառայության առաջին զորակոչը։ Վաղ առավոտից Հրազդանի տարածքային զինվորական կոմիսարիատի բակում հավաքվել էին զորակոչիկներ՝ իրենց կյանքի կարևորագույն փուլերից մեկի շեմին։ Նրանց կողքին էին ծնողները, հարազատներն ու ընկերները՝ հուզմունքով, բայց նաև հպարտությամբ լի։

Զորակոչիկների դեմքերին արտացոլված էին տարբեր զգացողություններ՝ անհանգստություն, ոգևորություն և պատասխանատվության գիտակցում։ Ոմանք փորձում էին թեթևացնել պահի լարվածությունը կատակներով, մյուսները լուռ էին՝ պատրաստ ընդունելու նոր պարտականությունները։ Բոլորին միավորում էր մի գաղափար՝ ծառայություն հայրենիքին։

Զորակոչիկներից մեկը նշում էր․ «Մայրիկս ամենաշատն է հուզվում, բայց ես պատրաստ եմ ծառայության»։ Մյուսը շեշտում էր, որ զինվորական ծառայությունը համարում է ոչ թե պարտադրանք, այլ գիտակցված պարտք պետության և ժողովրդի հանդեպ։

Նշենք, որ Պաշտպանության նախարարությունը հանրային քննարկման է ներկայացրել նախագիծ, որով առաջարկվում է 2026 թվականի ամառային զորակոչից պարտադիր զինվորական ծառայության ժամկետը կրճատել 6 ամսով՝ 24 ամսից դարձնելով 18 ամիս։ Նախագիծը միտված է զորակոչի գործընթացի առավել արդյունավետ կազմակերպմանը՝ միաժամանակ պահպանելով զինծառայողների անվտանգության, առողջության և ծառայության որակի առաջնահերթությունը։

Զորակոչը կազմակերպվել էր Հրազդանի տարածքային զինվորական կոմիսարիատի կողմից՝ ժամանակավոր պաշտոնակատար Էմին Վարդանյանի ղեկավարությամբ։ Կոմիսարիատում ընդգծում են, որ զորակոչի ողջ ընթացքում ցուցաբերվել է բարձր պրոֆեսիոնալիզմ, առանձնահատուկ ուշադրություն է դարձվել յուրաքանչյուր զինվորի առողջական վիճակին և անվտանգությանը։ Միաժամանակ հաշվի է առնվել ծնողների հուզական վիճակը՝ գործընթացը կազմակերպելով առավել մարդկային և վերահսկելի միջավայրում։

Հրազդանում զորակոչն անցել է խաղաղ և կազմակերպված պայմաններում։ Չնայած հուզական պահերին՝ օրվա ընթացքում գերակշռել են կարգապահությունն ու պատասխանատվության զգացումը։ Պետությունն ընդգծում է, որ մեր սահմանները պաշտպանված են, զինվորը՝ ապահով, իսկ զինված ուժերը մշտապես զգոն են։

Առաջին զորակոչի օրը Հրազդանում կմնա զորակոչիկների և նրանց ընտանիքների հիշողության մեջ՝ որպես հրաժեշտ մանկությանը և առաջին քայլ դեպի ծառայություն ու հայրենիքի պաշտպանություն։ 

Տեսանյութը՝ Հրազդանի քաղաքապետ Սևակ Միքայելյանի պաշտոնական ֆեյսբուքյան էջից

Մանրամասները՝տեսանյութում