Վրաստանում ընդդիմությունը գնացել է ժամանակավոր հանգստի և դադարեցրել է բողոքի ակցիաները
Թբիլիսիում ընդդիմությունը երրորդ գիշերն է անցկացրել Ճավճավաձեի պողոտայում՝ պետական համալսարանի շենքի դիմաց։
Նոյեմբերի 20-ի գիշերը ոստիկանությունը կրկին, ինչպես նախորդ օրը, դուրս է մղել ցուցարարներին այնտեղից։
Այն բանից հետո, երբ մի քանի հարյուր ոստիկաններ սկսեցին շարժվել, ցուցարարները նահանջեցին դեպի Մելիքիշվիլի պողոտա։ Ինչպես լրագրողներին հայտնել է Վրաստանի ՆԳՆ պարեկային ոստիկանության պետ Վաժա Սիրաձեն, ակցիայի մասնակիցներին տրվել է նախազգուշացում՝ ազատել պողոտայի ճանապարհը և շարժվել դեպի մայթ։
Ընդդիմության առաջնորդներից Գեորգի Վաշաձեն ասել է, որ ցուցարարները չեն բախվի ոստիկանության հետ և կշարունակեն շարժվել ճանապարհներով։
Այն բանից հետո, երբ իրավիճակը կայունացել է ընդդիմության առաջնորդներից Զուրաբ Ջափարիձեն ցուցարարներին հայտարարել է, որ իմաստ չունի բողոքի ակցիան այս տեսքով շարունակել։ Նա հավաքվածներին հորդորել է գնալ տուն և պատրաստվել հետագա բողոքի ակցիաներին։
«Նրանք փոխել են իրենց ռազմավարությունը, թույլ են տալիս մեզ արգելափակել Մելիքիշվիլի փողոցը։ Նրանք ասում են, որ դա իրենց համար անհարմարություն չէ։ Մենք որոշեցինք հետաձգել միջոցառումը, մտածել այլ վայրի կամ բողոքի ձևի մասին, որն ավելի մեծ անհանգստություն կպատճառի նրանց»,- ասել է Ջափարիձեն։
