ՌԴ ԱԳՆ պաշտոնական ներկայացուցիչ Մարիա Զախարովան Ուկրաինայի նախագահ Վոլոդիմիր Զելենսկուն անվանել է «անհագ հրեշ»։ Նրա խոսքով՝ Զելենսկին Բրյուսելում ԵՄ գագաթնաժողովի ժամանակ Եվրամիությունից պահանջել է 2027 թվականին Ուկրաինայի ռազմական կարիքների համար հատկացնել 70 միլիարդ եվրո։

«Ակնհայտ է, որ ԵՄ-ում այժմ ավելի կարևոր գործեր են գտել, քան Կիևի ռեժիմի անվերջանալի պահանջների քննարկումը։ Նման շրջադարձն ակնհայտորեն խոցել է Զելենսկու ինքնասիրությունը և նա, առանց իրեն լավ վարքագծով ծանրաբեռնելու, բավականին լկտիաբար պահանջել է իր եվրոպացի հովանավորներից ավելացնել ռազմական կարիքների համար հատկացումները։ Գիտե՞ք՝ այս անգամ ի՞նչ գումար է պահանջել այդ անհագ հրեշը։ Նրա խոսքով՝ առնվազն 70 միլիարդ եվրո»,- ասել է Զախարովան ճեպազրույցի ժամանակ։

Նրա խոսքով՝ այդ գումարը նախատեսված է լրացուցիչ ծախսերի համար՝ 2027 թվականին, և Զելենսկին, իբր, փորձում է նախապես ապահովել անհրաժեշտ ֆինանսավորումը։

«Երևի որոշել է չափազանց չբարձրացնել նշաձողը և դաշնակիցներին նմանատիպ առատաձեռն զեղչ առաջարկել, քանի որ Կիևում վաղուց սովոր են ուրիշների փողերը հաշվել մեծ պահուստով և սեփական գրպանի հաշվարկով։ Ինչո՞ւ եմ այդպես ասում։ Որովհետև նա 2027 թվականին Ուկրաինայում ռազմական գործողությունների վարումը գնահատել է 155 միլիարդ եվրո, իսկ պահանջել՝ 70 միլիարդ։ Պատկերացնո՞ւմ եք՝ ինչ հրեշավոր մանիպուլյացիա է սա։ Սա իսկական մատնաշարի խաղ է»,- նշել է դիվանագետը։

Զախարովան հավելել է, որ ԵՄ գործընկերներին ավելի զիջող դարձնելու նպատակով Զելենսկին, իր գնահատմամբ, շահարկում է Եվրոպայի միգրացիոն խնդիրները՝ սպառնալով, որ Ռուսաստանի հաղթանակի դեպքում Եվրոպան կարող է բախվել Ուկրաինայից մինչև 20 միլիոն փախստականի ներհոսքի։

«Իսկ ինչո՞ւ նա ավելի վաղ այդ մասին չէր խոսում։ Ինչո՞ւ չէր նկատում, երբ Ուկրաինայում մանիպուլյացիաներ էին տեղի ունենում պետական կառուցվածքի, օրինական իշխանության և իրավական հիմքերի շուրջ»,- եզրափակել է Զախարովան։