« Ուժեղ Հայաստան» շարժումն առաջադրեց վարչապետի իր թեկնածուին
Այսօր տեղի ունեցած «Ուժեղ Հայաստան» հասարակական-քաղաքական շարժման համագումարի շրջանակներում կայացավ վարչապետի թեկնածուի ընտրության գործընթացը։ Համագումարի պատվիրակների բացարձակ մեծամասնության որոշմամբ՝ որպես վարչապետի միասնական թեկնածու առաջադրվեց հայտնի գործարար և բարերար Սամվել Կարապետյանը։
Համագումարի ընթացքում շարժման ներկայացուցիչները հանդես եկան ելույթներով՝ հիմնավորելով, որ ներկայիս աշխարհաքաղաքական և տնտեսական մարտահրավերների պայմաններում Հայաստանին անհրաժեշտ է փորձառու կառավարիչ, ով ունի միջազգային կապեր և տնտեսությունը հզորացնելու հստակ ծրագիր։
«Սամվել Կարապետյանի թեկնածության շուրջ համախմբումը խորհրդանշում է մեր հավատը պրոֆեսիոնալիզմի և ազգային արժեքների նկատմամբ։ Սա նոր էջ է մեր պետականաշինության գործում»,- նշված է շարժման հայտարարության մեջ։
Առաջիկայում «Ուժեղ Հայաստան» շարժումը հանդես կգա ընդարձակ ծրագրային դրույթների ներկայացմամբ և կսկսի հանդիպումների շարք թե՛ մայրաքաղաքում, թե՛ մարզերում։
Meganews.am
