Մայիսի 20-ին հերթական վիճաբանությունն է տեղի ունեցել Արարատի մարզում։ Ժամը 02։35-ի սահմաններում ՀՀ Ներքին գործերի նախարարության  ոստիկանության քրեական ոստիկանության գլխավոր վարչության Արարատի  մարզային վարչությունում և ՀՀ ՆԳՆ ոստիկանության համայնքային ոստիկանության գլխավոր վարչության Արտաշատի բաժնում օպերատիվ տեղեկություններ են ստացվել, որ Երևան-Երասխ ավտոճանապարհի 26 հասցեում գործող «Աուրա» գիշերային ակումբում վիճաբանություն է։

Ինչպես հայտնում է ֆոտոլրագրող Գագիկ Շամշյանը, պարզվել է, որ նույն օրը, ժամը 02։00-ի սահմաններում ակումբի հաճախորդը գարեջրի շիշ է կոտրել հատակին, իսկ անվտանգության աշխատակիցը դիտողություն է արել նրան և ընկերների հետ դուրս հրավիրել ակումբից։ Հեռանալուց որոշ ժամանակ անց նրանք մի խումբ անձանց հետ վերադարձել են ակումբ և փայտյա մահակներով կոտրել մուտքի դուռը, սրահի գույքը։

Ֆոտոլրագրողի տեղեկություններով՝ վերը նշված անձանց հայտնաբերել են, խուլիգանություն կատարելու կասկածանքով տեղափոխել ոստիկանության Արտաշատի բաժին։