20 մլն դրամ կանխիկ, 30 հազար դոլար և Mercedes-Benz․ ինչ ունեցվածք ունի Էրեբունի վարչական շրջանի ղեկավարի տեղակալ Պետրոս Սարգսյանը
«Ժողովուրդ» օրաթերթը շարունակում է ուսումնասիրել պաշտոնատար անձանց հայտարարագրերը՝ ներկայացնելով, թե ինչ ունեցվածք ունեն նրանք, ինչ եկամուտներ են ստացել և ինչ ֆինանսական պարտավորություններ ունեն։
Այս անգամ ուսումնասիրել ենք Երևանի Էրեբունի վարչական շրջանի ղեկավարի տեղակալ Պետրոս Սարգսյանի՝ 2025 թվականի տարեկան հայտարարագիրը։
Պետրոս Սարգսյանը ծնվել է 1996 թվականի հոկտեմբերի 12-ին՝ Երևանում։ Մասնագիտական գործունեությունը սկսել է «Արգելոցապարկային համալիր» պետական ոչ առևտրային կազմակերպությունում։ Այնուհետև աշխատել է «Էրեբունի» պատմահնագիտական արգելոց-թանգարանում, ապա՝ Երևանի քաղաքապետարանի առևտրի և սպասարկումների վարչությունում։ 2022 թվականի հուլիսի 28-ից զբաղեցնում է Երևանի Էրեբունի վարչական շրջանի ղեկավարի տեղակալի պաշտոնը։
Անշարժ գույք
ArmLur.am –ը պարզեց, որ 2025 թվականի հայտարարագրի համաձայն նա ունի համատեղ սեփականության իրավունքով Երևանում գտնվող բնակարան, որը ձեռք է բերել 2023 թվականի հոկտեմբերի 5-ին՝ գնման եղանակով։ 2025 թվականի ընթացքում նա նոր անշարժ գույք չի ձեռք բերել և առկա գույքից որևէ մեկը չի օտարել։
Տրանսպորտային միջոց
Պետրոս Սարգսյանի անունով շարունակում է հաշվառված մնալ 2009 թվականի արտադրության MERCEDES-BENZ մակնիշի մարդատար ավտոմեքենան։ Այն ձեռք է բերել 2021 թվականի հունիսի 21-ին՝ գնման եղանակով։ 2025 թվականի ընթացքում նոր մեքենա ձեռք բերելու կամ առկա մեքենան օտարելու վերաբերյալ տվյալներ չկան։
Դրամական միջոցներ
Պետրոս Սարգսյանի բանկային հաշիվների մնացորդները 2025 թվականի ընթացքում փոփոխվել են։ Տարվա սկզբին նրա երկու բանկային հաշիվներում առկա է եղել համապատասխանաբար 48 հազար 596 դրամ և 309 հազար 890 դրամ։ Տարվա վերջին առաջին հաշվի մնացորդը կազմել է 230 հազար 262 դրամ, իսկ երկրորդինը մնացել է անփոփոխ՝ 309 հազար 890 դրամ։
Այսպիսով, եթե տարվա սկզբին բանկային հաշիվներում ընդհանուր առմամբ ունեցել է 358 հազար 486 դրամ, ապա տարեվերջին այդ գումարը կազմել է 540 հազար 152 դրամ։
Կանխիկ դրամական միջոցների մասով, սակայն, փոփոխություն չի արձանագրվել։ Սարգսյանը տարվա սկզբին և տարեվերջին հայտարարագրել է 8 հազար եվրո, 800 հազար ռուսական ռուբլի, 30 հազար ԱՄՆ դոլար և 20 միլիոն դրամ կանխիկ գումար։
Եկամուտ
ArmLur.am –ը պարզեց, որ 2025 թվականի ընթացքում Պետրոս Սարգսյանը Երևանի քաղաքապետարանի աշխատակազմից ստացել է 7 միլիոն 846 հազար 372 դրամ աշխատավարձ։
Բացի այդ, հայտարարագրել է երեք բանկից ստացված վարկեր՝ «ԱյԴի Բանկից»՝ 2 միլիոն 600 հազար դրամ, «Ամիո Բանկից»՝ 3 միլիոն 700 հազար դրամ, իսկ «Ակբա Բանկից»՝ 594 հազար դրամ։
Այսպիսով, հայտարարագրում նշված ընդհանուր եկամուտը կազմել է 14 միլիոն 740 հազար 372 դրամ, որից 7 միլիոն 846 հազար 372 դրամը աշխատանքի վարձատրությունն է, իսկ մնացած մասը՝ ստացված վարկերը։ 
Վարկային պարտավորություններ և ծախսեր
2025 թվականի դեկտեմբերի 31-ի դրությամբ Պետրոս Սարգսյանի վարկերի մայր գումարի մնացորդը կազմել է ընդհանուր 39 միլիոն 813 հազար 349 դրամ։ Դրանցից մեկի մնացորդը 898 հազար դրամ է, մյուսինը՝ 436 հազար 423 դրամ, երրորդինը՝ 179 հազար 558 դրամ։ Ամենախոշոր պարտավորությունը 38 միլիոն 299 հազար 368 դրամ է, որը հիփոթեքային վարկ է՝ բնակարանի ձեռքբերման նպատակով։
Հայտարարագրում նշված է նաև, որ 2025 թվականին վարկերի մարմանն ուղղված վճարումները կազմել են 2 միլիոն 500 հազար դրամ։
Շահեր
ArmLur.am –ը արձանագրեց, որ Պետրոս Սարգսյանը «Քաղաքացիական պայմանագիր» կուսակցության անդամ է։
Այսպիսով, Պետրոս Սարգսյանը 2025 թվականի հայտարարագրի համաձայն ունի Երևանի համատեղ սեփականությամբ բնակարան, 2009 թվականի արտադրության MERCEDES-BENZ ավտոմեքենա, 20 միլիոն դրամ, 30 հազար ԱՄՆ դոլար, 8 հազար եվրո և 800 հազար ռուսական ռուբլի կանխիկ գումար։ Բանկային հաշիվներում տարեվերջին ունեցել է ընդհանուր 540 հազար 152 դրամ։ 2025 թվականին նրա աշխատավարձը կազմել է 7 միլիոն 846 հազար 372 դրամ, իսկ վարկային պարտավորությունների ընդհանուր մնացորդը՝ 39 միլիոն 813 հազար 349 դրամ։