Ժամը 18․30-ի դրությամբ Վաղարշապատի ընտրություններում արձանագրվել է 20 խախտում, որոնցից ընթացակարգային էին 9-ը․ լրագրողների հետ ճեպազրույցում ամփափելով «Անկախ դիտորդ»-ի առաքելության արդյունքները՝ ասաց ԻՔՄ ծրագրերի համակարգող Դանիել Իոաննիսյանը։

Նա նշեց, որ  իրենց դիտորդներն այցելել են բոլոր ընտրական տեղամասերով։

Ըստ նրա՝ եղել է բաց քվերակություն, քվեատուփը կապարակնքված չի եղել։ Նաև ահազանգեր են եղել այլ անձի փոխարեն քվեարկության մասին, որոնք, ըստ նրա, ստուգել են և համոզվել, որ կեղծ են։

«Եղել են ահազանգեր 6 տեղամասերից այլ անձի փոխարեն քվեարկության մասին. ընտրողը եկել է տեղամաս և տեսել է, որ ստորագրված է իր անվան դիմաց։ Սակայն, խնդիրն այն է, որ էլեկտրոնային գրանցման սարքով անցել է և միայն իր անվան դիմաց են տեսել, որ կա ստորագրություն, ինչը ուղղակի հետևանք է, որ մեկ այլ ընտրող պատահաբար սխալ տողում է ստորագրել»,-ասաց Իոաննիսյանը։

Ի դեպ, նա ասաց, որ կուտակումներ չեն արձանագրել, ուղղակի ավելի շատ թվով ընտրողներ են եղել, ինչը կուտակում չէ։