«Բարգավաճ Հայաստան» կուսակցության առաջնորդ Գագիկ Ծառուկյանի Գեղարքունիքի մարզ կատարած այցի հաջորդ կանգառը Գեղամասարն էր։ Մոտակա բարձրունքներին և լեռներում տեղակայված են ադրբեջանական դիրքեր, և, ըստ Ծառուկյանի, սահմանամերձ գյուղերի բնակիչները պետք է գտնվեն առանձնահատուկ ուշադրության և հոգածության կենտրոնում։ Նա ներկայացրեց իր թիմի ծրագիրը բնակիչներին։

«Այս ծրագիրը չի ստեղծվել կաբինետներում, մարդկանցից կտրված չէ, — նշեց նա։ — Մենք շփվել ենք մարդկանց հետ, լսել ենք նրանց խնդիրները և արդեն մասնագետների հետ միասին մշակել ենք լուծումներ։ Եթե կան հարցեր կամ խնդիրներ, որոնք դեռ ծրագրում ներառված չեն, անպայման կավելացնենք»։

Նրա խոսքով՝ երկիրը ղեկավարելու համար անհրաժեշտ են փորձառու և գրագետ մասնագետներ։ Նա ընդգծեց, որ իր համար առաջնահերթը կուսակցական պատկանելությունը չէ, այլ մասնագիտական որակն ու պրոֆեսիոնալիզմը:

«Նույնիսկ եթե դու աշխարհի ամենաուժեղ կամ ամենահարուստ մարդն ես, առանց ճիշտ թիմի, առանց խելացի և փորձառու մարդկանց ոչինչ չի ստացվի։ Պետք են մարդիկ, որոնք աշխատել են, ստեղծել են և իրական փորձ ունեն, և հենց նրանք պետք է ղեկավարեն իրենց ոլորտները», — ասաց նա։

Ծառուկյանը նաև ընդգծեց, որ ոչ մի մարդ և ոչ մի կուսակցություն միայնակ չի կարող լուծել առկա խնդիրները․ «Այսօր մենք հասել ենք այն կետին, որ պետք է ազգովի համախմբվենք։ Միայն միասին կարող ենք դուրս գալ այս իրավիճակից»։

Գեղամասարի բնակիչները մանրամասն ներկայացրեցին իրենց ամենօրյա խնդիրները՝ անասնապահության նվազում, սպանդանոցների խնդիրներ, ոռոգման ջրի բացակայություն։ Նրանց խոսքով՝ գյուղատնտեսությունը անկում է ապրում, հողերը մնում են անմշակ, իսկ ֆերմերները չեն կարողանում վճարել վարկերը և ապահովել ընտանիքները։

«Անասնապահությունը ոչ միայն նվազում է, այլ արդեն վերանում է», — նշում էին բնակիչները։

Առանձնահատուկ սուր է ջրամատակարարման խնդիրը։ Բնակիչներից մեկի խոսքով՝ եթե նույնիսկ 2000–4000 հեկտար հողերի առնվազն 20%-ը ոռոգվի, մարդիկ կկարողանան ինքնուրույն աշխատել և ապահովել իրենց։

Ծառուկյանը, պատասխանելով այս հարցերին, ընդգծեց համակարգային լուծումների անհրաժեշտությունը՝ ոռոգման համակարգերի զարգացում, ջրամբարների կառուցում, հալոցքային ջրերի օգտագործում, գյուղերին տեխնիկայի և աջակցության տրամադրում։

«Պետությունը պետք է իր քաղաքացիների մասին մտածի այնպես, ինչպես հայրը մտածում է իր ընտանիքի մասին», — ասաց նա։

Նա նաև կոչ արեց քաղաքացիներին ակտիվ մասնակցել առաջիկա ընտրություններին և վստահել այն մարդկանց, ովքեր ունեն փորձ և ցանկություն աշխատելու երկրի շահերի համար։

«Եթե դուք հնարավորություն տաք որոշումներ կայացնելու, դուք ամեն օր կզգաք փոփոխությունները։ Մենք ունենք կապեր, հնարավորություններ և ճիշտ մարդիկ թիմում», — նշեց նա։

Բնակիչները հրավիրեցին Ծառուկյանին այցելել նաև այլ համայնքներ, ինչին նա համաձայնեց՝ ընդգծելով, որ մարդկանց վստահությունը իրեն պարտավորեցնում է ավելի շատ աշխատել։

Գեղամասարում հնչեցին նաև կոչեր, որպեսզի Ծառուկյանը զբաղեցնի վարչապետի պաշտոնը։ Սակայն նա կրկին նշեց, որ նման նպատակ չի դնում իր առջև․

«Ես չեմ հայտարարել, որ ուզում եմ դառնալ վարչապետ։ Մենք կառաջարկենք այնպիսի թեկնածու, ով կկարողանա ստանձնել այդ պատասխանատվությունը՝ փորձառու, գրագետ և արդյունավետ կառավարելու ունակ մարդ»։

Պաշտոնական հանդիպումից հետո զրույցը շարունակվեց ոչ պաշտոնական մթնոլորտում՝ հյուրասիրության սեղանի շուրջ, որտեղ բնակիչները շարունակեցին անկեղծ քննարկումները։

Տեղացիները նշում էին, որ Ծառուկյանը արդեն շատ բան է արել և կարող էր չզբաղվել հասարակական գործունեությամբ, սակայն շարունակում է աշխատել երկրի համար։

«Եթե նա միայն իր մասին մտածեր, նրան ոչինչ պետք չէր լինի։ Բայց նա մտածում է ժողովրդի մասին, և մենք պետք է համախմբվենք այս ճգնաժամից դուրս գալու համար», — ասում էին նրանք։

Բնակիչները նաև ընդգծեցին նրա ներդրումը աշխատատեղերի ստեղծման և մարզերի զարգացման գործում՝ նշելով, որ նման մարդիկ անհրաժեշտ են երկրին։

«Նա գործի մարդ է, հայրենասեր, ով ներդրում է անում երկրում և աջակցում մարդկանց։ Եթե նա ղեկավար դառնա, ավելի լավ կլինի», — նշում էին հանդիպման մասնակիցները։

Իր հերթին Ծառուկյանը շնորհակալություն հայտնեց ջերմ ընդունելության համար՝ ընդգծելով, որ մարդկանց վստահությունն ու աջակցությունը իրեն ուժ են տալիս շարունակելու աշխատանքը և իրականացնելու նախատեսված ծրագրերը։