«Աշխատանքներ են տարվում Ադրբեջանի և Հայաստանի ԱԳ նախարարների հաջորդ հանդիպման հստակ ժամկետները որոշելու ուղղությամբ։ Հուսով ենք, որ այդ հանդիպումը կկայանա մոտ ապագայում», - ԱՊԱ գործակալությանն ասել է Ադրբեջանի ԱԳ նախարարության մամուլի ծառայության ղեկավար Այխան Հաջիզադեն։

«Որպես կանոն, հանդիպման ստույգ օրը հայտարարում է հանդիպումը կազմակերպող երկիրը», - հավելել է նա։

Հիշեցնենք՝ այսօր ՀՀ ԱԳՆ-ից հաղորդել էին, որ ադրբեջանական կողմի խնդրանքով մյուս շաբաթ Վաշինգտոնում  նախատեսվող քննարկումների հերթական փուլը հետաձգվում է։

Ավելի վաղ էլ հաղորդվել էր, որ Հայաստանի և Ադրբեջանի  արտաքին գործերի նախարարների մակարդակով հանդիպումը ԱՄՆ մայրաքաղաք Վաշինգտոնում նախատեսվում է անցկացնել հունիսի 12-ին: