Դիլիջանի քրեականի պետի մասով կա կարգապահական վարույթ, միջադեպի մասին տեղեկատվությունը ստացել է հենց ոստիկանության ներքին անվտանգության վարչությունը ու ծառայողական քննությունը հարուցել է հենց ներքին անվտանգության վարչությունը։
Այս մասին լրագրողների հետ զրույցում, անդրադառնալով ՆԳՆ ոստիկանության Տավուշի մարզային վարչության Դիլիջանի բաժնի քրեական հետախուզության բաժանմունքի պետի կողմից 16-ամյա տղային ծեծելու դեպքին, ասաց ՆԳ փոխնախարար Արփինե Սարգսյանը։

«Ցանկացած բռնություն, բնականաբար ընդունելի չէ, իրավաչափ վարույթի շրջանակներում, եթե հաստատվի դեպքը, անձինք դուրս կգան ծառայությունից»,- ասաց նա։

Սարգսյանը անդրադարձավ նաև օրեր առաջ «Գինու փառատոն»-ի ժամանակ ոստիկանի կոմից քաղաքացուն հարվածելու և գետնին գցելու դեպքին և ասաց, որ այդ դեպքով ևս ընթանում է ծառայողական քննություն։

«Երկու աշխատակցի լիազորություններն էլ դադարեցված են։ Այս իրավիճակը ընդհանրապես չի կարող բացառվել, որովհետև գործ ունենք մեծ ծառայության հետ ու կարող են եզակի դեպքեր վրա հասնել, կարևոր է պետության արձագանքը այս դեպքերին։

Երկու դեպքում էլ իրականացվել է ծառայողական քննություն, հատուկ շեշտում եմ, որ դա հանրային հնչեղությունից հետո չի եղել, եթե ծանոթանաք ՆԳՆ հայտարարությանը, մայիսի 5-ից հետո ոստիկանությունը դադարեցրել է ծառայողի լիազորությունները, մնացած հատվածները չեն առնչվում ՆԳՆ-ին»,- ասաց Արփինե Սարգսյանը։