«Մենք կանաչ տարածքները կորցնելու ենք ամբողջությամբ:  Բետոնային ծածկույթ է առաջարկվում  կիսաանապատային կլիմայական պայմաններում գտնվող Երևանի համար, որը, հակառակը, ունի  կանաչ գոտիների  կարիք։ Կանաչ գոտին ամբողջությամբ վերանալու է այդ հատվածում»,- Aysor.am-ին ասաց ավագանու «Ազգային առաջընթաց» խմբակցության անդամ Նարե Արամյանը՝անդրադառանալով «Կասկադ» համալիրի արդիականացման նախագծին:

Նրա խոսքով՝ նախագիծը ոչ միայն հակասում է  «Կասկադի»  քաղաքաշինական տեսքին, հորինվածքին ու հայկական ճարտարապետությանը հատուկ տարրին, այլև Երևան քաղաքի հետ ընդհանուր ոչ մի բան չունի.

«Նախագիծը մտածողները որևէ կերպ Երևանի ուսումնասիրությանը չեն լծվել, Կասկադն էլ անձամբ չեն տեսել»:

Նարե Արամյանի խոսքով՝ ոչ ոք չի վիճում, որ Կասկադն անհրաժեշտ է բարեկարգել, սակայն առանց հանրային քննարկումների, մասնագիտական աշխատանքային խմբերի՝ այսպիսի որոշումներ կայացնել չի կարելի.

«Առավել ևս՝ անցնել շինարարական, քանդման կամ կառուցապատման աշխատանքների»: