Ֆրանսիան կոչ է անում դադարեցնել Գազայի հատվածում ռմբակոծությունները և հումանիտար զինադադար հաստատել: Այս մասին, ինչպես գրում է ՏԱՍՍ գործակալությունը, լրագրողների հետ զրույցում հայտարարել է Ֆրանսիայի նախագահ Էմանուել Մակրոնը։

«Մենք զինադադարի կոչ ենք անում, քանի որ ահաբեկչության դեմ պայքարը չի արդարացնում խաղաղ բնակիչների զոհաբերությունը»,- ասել է Մակրոնը։

Նա ընդգծել է, որ «խաղաղ բնակիչներին պաշտպանելու համար անհրաժեշտ է դադարեցնել ռմբակոծությունը, կազմակերպել մարդասիրական օգնության տրամադրումը և վերացնել Գազայի շրջափակումը»։

Ֆրանսիայի նախագահը նաև աջակցել է պաղեստինցիների՝ սեփական պետությունն ունենալու պահանջին։ Նրա կարծիքով՝ «Պաղեստինի ժողովրդի օրինական ձգտումներին պետք է քաղաքական մարմնավորում տրվի»։