Ադրբեջանը հրաժարվել է ազատ արձակել մոտ 200 հայ ռազմագերու. դա միջազգային իրավունքի ակնհայտ խախտում է. ԵԽԽՎ նիստում ելույթ ունեցած պատգամավորները կոչ են արել ազատ արձակել բոլոր պահվող անձանց

Այսօր Ստրասբուրգում կայացած ԵԽԽՎ նիստի գարնանային լիագումար նիստի շրջանակներում քննարկվել է Ադրբեջանում պահվող հայ ռամզագերիների հարցը, որին ավելի քան մեկ ժամ է հատկացվել:

Ռազմագերիների պահումը չի նպաստում կողմերի միջև վստահության հաստատմանը: Այս մասին ԵԽԽՎ լիագումար նիստում հայտարարել է ֆինլանդացի պատգամավոր Կիմմո Կիլյունենը:

«Ցանկանում եմ երկու կարևոր պահ առանձնացնել. բոլոր պահվող անձանց փոխանակումը հումանիտար իրավունքի, մարդասիրության հարց է: Նրանք բոլորը պետք է ազատ արձակվեն: Այդ մասին փաստում է նաև եռակողմ հայտարարությունը: Այդ հարցը պետք է լիարժեք լուծվի, որպեսզի կարողանան անցնել վստահության հաստատմանը: Եվս մեկ կարևոր հարց. դա մշակութային ժառանգությանն է առնչվում: Այդ տարածաշրջանը շատ հարուստ է մշակութային ժառանգությամբ: Հուսով եմ, որ երկու կողմերը կկարողանան այնպես վարել վերակառուցման գործընթացը, որպեսզի պաշտպանեն մշակութային ժառանգութունը», - ասել է պատգամավորը:

Ֆրանսիացի պատգամավոր Բեռնար Ֆուրնյեն իր ելույթում ևս կոչ է արել Ադրբեջանի կառավարությանը ազատ արձակել հայ ռազմագերիներին: «ՄԻԵԴ-ը հակամարտության ընթացքում և դրանից հետո կողմերին կոչ է արել կատարել Գերիների մասին կոնվենցիայի դրույթները»,- ասել է նա:



ԵԽԽՎ պորտուգալացի պատգամավոր Պոլ Սոչպիսկոն, իր հերթին, արձանագրել է, որ Ադրբեջանը չի կատարում անցյալ տարվա նոյեմբերի 9-ի համատեղ հայտարարության շրջանակներում ստանձնած պարտավորությունները: Պատգամավորը շեշտել է, որ պետք է պնդել հայ ռազմագերիների և ձերբակալվածների վերադարձը:

«Մեր խնդիրն այն չէ, որ փորձենք կարգավորել տարաձայնությունները Հայաստանի և Ադրբեջանի միջև, չպետք է մոռանանք, որ դրանով զբաղվում են այլ կազմակերպություններ և ԵԱՀԿ-ն: Սակայն մենք պետք է ուշադրություն դարձնենք ռազմագերիների, տեղահանված անձանց և այլ գերիների հարցին, քանի որ մենք Եվրոպայի խորհրդի ներսում զբաղվում ենք մարդու իրավունքների արժեքների պահպանման հարցերով»,- ԵԽԽՎ-ում հայ գերիների հարցով քննարկմանն ասել է ֆրանսիացի պատվիրակ Ալան Միոնը։

«Մենք չպետք է սահմանափակվենք հռչակագրերով: 2020 թվականի նոյեմբերի 9-ին եռակողմ հայտարարություն է կնքվել, որով սահմանվում է, որ բոլոր գերիներն ու պահվող անձինք պետք է ազատ արձակվեն: Հայաստանը հարգել է այդ պայմանավորվածությունը, սակայն Ադրբեջանը հրաժարվել է ազատ արձակել մոտ 200 հայ ռազմագերու: Ադրբեջանական կողմը հրաժարվել է թափանցիկություն դրսևորել, ինչը միջազգային իրավունքի ակնհայտ խախտում է, մասնավորապես Ժնևյան կոնվենցիայի, որում ասվում է, որ ռազմագերիները պետք է տուն վերադարձվեն ռազմական հակամարտության ավարտին»,- շեշտել է ֆրանսիացի եվրապատգամավոր Ալեքսանդրա Լուիսը:

Ելույթներով են հանդես եկել նաև ինչպես հայ, այնպես էլ ադրբեջանցի պատվիրակները։

Քննարկման ավարտին հայտարարվել է, որ  ԵԽԽՎ-ն որևէ որոշում չի կայացնելու այս հարցի շուրջ, սակայն առաջարկվել է քննարկումները շարունակել վաղը:

Այս թեմայով
am