Նիկոլ Փաշինյանը լիարժեք երջանկության մեջ է. «Ոչ»-ի կողմնակիցների մասին խոսում է հեգնանքով

«Փաստ» թերթը գրում է. «Երեկ վարչապետ Նիկոլ Փաշինյանը լիարժեք երջանկության մեջ էր՝ երկարատեւ ընդմիջումից հետո հանրահավաք կազմակերպելու ու ելույթ ունենալու հնարավորություն ուներ, այն էլ՝ մի քանի բնակավայրերում: Երջանկությունն ավելի է ամբողջանում այն հանգամանքով պայմանավորված, որ առջեւում այդպիսի մոտ երեք շաբաթ կա: Քարոզարշավին մասնակցելու համար նա նույնիսկ արձակուրդ է վերցրել:

Երեկ շատ շահարկվեց ուղղաթիռով Սյունիք մեկնելու հարցը. ոմանք դա որակեցին աօրենքի խախտում, իսկ Փաշինյանը նորից հիշեց, որ ուղղաթիռը չշահագործելուց ժանգոտվում է, իսկ ինքը պետական պահպանության ենթակա պաշտոնատար անձ է: Բայց սա, ըստ էության, ամենաառաջնայինը չէ, քանզի փաստացի թե՛ նախկինում, թե՛ հիմա արձակուրդ վերցնելը պարզապես ձեւական կողմն է, սոսկ օրենքի տառի պահանջ. ի վերջո, նույն Փաշինյանին հանդիպողները նրան իրենց խնդիրներով դիմում են որպես վարչապետ, այլ ոչ որպես ՔՊԿ փաստացի ղեկավար:

Մի կողմ թողնենք նաեւ այն հանգամանքը, որ «Փաստն» անընդհատ տեղերից տեղեկություններ է ստանում, որ պետական ամբողջ մեքենան մոբիլիզացվում է վարչապետի հանրահավաքներին հնարավորինս շատ մարդ ապահովելու համար: Շատ ավելի մտահոգիչ են ակտիվ քարոզարշավի առաջին իսկ օրն աչք ծակող մի քանի երեւույթներ:

Նախ՝ դպրոցները չքաղաքականացնելու մասին տարփողող ու ժամանակին դպրոցականներին քարոզարշավի մեջ ընդգրկելը քննադատող իշխանավորները երեկ հանգիստ էին վերաբերվում դասերի ժամին իրենց դիմավորողների ու հանրահավաքների մասնակիցների շարքերում դպրոցական երեխաների ներկայությանը:

Անկախ հետագա «կրուտիտներից» ու հնարավոր «քավության նոխազներ» գտնելու հավանականությունից, ակնհայտ էր, որ իշխանավորները դժգոհ չեն այդ վիճակից: Ու դա զարմանալի չէ, քանզի 2018-ի իշխանափոխության ժամանակ էլ էին ակտիվորեն ներգրավում դպրոցականներին:

Մյուս կողմից՝ վարչապետը հերթական անգամ իրեն թույլ տվեց տարբեր մեղադրանքներ, որոնք իրավական հիմնավորում չունեն, ավելին՝ «Ոչ»-ի կողմնակիցների մասին խոսում էր հեգնանքով, ՍԴ դատավորների մասին՝ վիրավորական արտահայտություններով, դե, իսկ նախկինների թեման հավերժական է: Այդպես լինելու է դեռ 23 օր»:

Առավել մանրամասն՝ թերթի այսօրվա համարում

Այս թեմայով
am