Ստամբուլյան կոնվենցիան ական է` դրված մեր հասարակության և պետականության տակ, որի վավերացումը թույլ չենք տալու. Նարեկ Սամսոնյան

«Քաղաքացիական գիտակցություն» ՀԿ նախագահ Նարեկ Սամսոնյանը Ստամբուլյան կոնվենցիայի վավերացման դեմ պայքար է սկսում․ այս մասին նա տեղեկացրել է իր ֆեյսբուքյան էջում։

Գրառումն ամբողջությամբ ներկայացնում ենք ստորև․

«Երեկ ասացի, որ կարևոր հայտարարություն ունեմ, որը տեխնիկական պատճառներով չկարողացա հրապարակել: Ժամանակ չկորցնելու համար գրառման տեսքով հրապարակեմ երեկվա խոստացածս: 
Ուրեմն երկար ժամանակ ուսումնասիրում եմ Ստամբուլյան կոնվենցիայի շուրջ ստեղծված աղմուկն ու բուն կոնվենցիան: Իրականում Կոնվենցիան իր հիմնական կարգավորման ոլորտից դուրս փաստաթուղթ է և հեռու է կանանց նկատմամբ բռնության բացառման իր հռչակած նպատակից: Կոնվենցիայի վավերացումը լուրջ վտանգներ է պարունակում, և դրա վավերացման դեմ արդյունավետ պայքարի անհրաժեշտություն կա: 

Մոտակա օրերի ընթացքում պատրաստվում եմ կոնսուլտացիաների և հանդիպումների շարք սկսել սույն թեմայով շահագրգիռ անձանց և կառույցների հետ: Ընթացիկ արդյունքների մասին կհայտնեմ ընթացքում:

Մինչ այդ ավելացնեմ միայն, որ Ստամբուլյան կոնվենցիային դեմ լինել չի նշանակում կողմ լինել բռնությանը, կոնվենցիային դեմ լինելն ու լիբերալ գաղափարախոսությունը իրար հակադիր բևեռներում չեն կարող գտնվել և այսպես շարունակ (ավելի մանրամասն անդրադառնալու բազմաթիվ առիթներ կունենանք): Ստամբուլյան կոնվենցիան ական է` դրված մեր հասարակության և պետականության տակ, որի վավերացումը թույլ չենք տալու»:

Այս թեմայով
am