Վերջերս սկանդալի կենտրոնում հայտնված վրացական «Ռուսթավի 2» հեռուստաընկերությունը վաճառվում է

Վրացական «Ռուսթավի 2» ընդդիմադիր հեռուստաընկերության նոր սեփականատեր Կիբար Խալվաշին հայտարարել է, որ վաճառում է այն՝ ավելի քան 24 մլն դոլար կուտակած պարտքի պատճառով, հայտնում է ria.ru-ն:

Խալվաշիի խոսքով՝ նա չի կարող հեռուստաընկերությունը դուրս բերել խոր ֆինանսական ճգնաժամից, իսկ այն գտնվում է «սնանկության եզրին»:

Գործարարն ընդգծել է, որ պատրաստ է բանակցությունների շահագրգռված ցանկացած մեկի հետ, բացի Վրաստանի նախկին նախագահ Միխեիլ Սաակաշվիլիից: Հայտնի է, որ Խալվաշին աջակցում է Վրաստանի գործող իշխանություններին:

«Ես որոշել եմ վաճառել «Ռուսթավի»-ն նրան, ով ամենաշատը կվճարի»,- ասել է նա:

Գործարարը մեղադրել է հեռուստաընկերության նախկին գլխավոր տնօրեն Նիկա Գվարամիային այն բանի համար, որ նա սկսել է «սնանկացնել» հեռուստաընկերությունն անմիջապես այն բանից հետո, երբ Խալվաշին հայտնել է հեռուստաընկերության նկատմամբ ունեցած իր իրավունքների մասին:

Ի դեպ, Նիկա Գվարամիային մեղադրանք է առաջադրվել լիազորությունների չարաշահման և հեռուստաընկերությանը ֆինանսական վնաս հասցնելու համար: Նրա փոխարեն նշանակվել է նոր տնօրեն՝ Խալվաշիի փաստաբան Պաատա Սալիան:

Հիշեցնենք, որ «Ռուսթավի 2»-ը վերջին շրջանում մեծ սկանդալի կենտրոնում էր հայտնվել: Մասնավորապես, հեռուստաալիքի հաղորդավար Գեորգի Գաբունիան իր «P.S.» հեղինակային ծրագիրը սկսել էր ՌԴ նախագահի հասցեին հայհոյանքներ տեղալով: Մեծ թվով օգտատերեր քննադատել էին Գաբունիային և մտավախություն հայտնել, որ վրաց-ռուսական հարաբերությունները կարող են է՛լ ավելի սրվել:

Հեռուստաընկերության գլխավոր տնօրեն Նիկա Գվարամիան էլ հայտարարել էր, որ անթույլատրելի է համարում հայհոյանքը եթերում, թեև կիսում է հեռուստահաղորդավարի կարծիքը:

Դրանից հետո Գվարամիան ուղիղ եթերում հայտնել էր, որ պատրաստ է միզել վրացական գինու և հանքային ջրերի մեջ՝ ի նշան վրեժի այն արտադրողների նկատմամբ, որոնք ապրանքն արտահանում են Ռուսաստան:

Որոշ լրատվամիջոցներ հայտնել էին, որ Գվարամիան ու Գաբունիան «զուգընկերներ» են:

 

Այս թեմայով
am