Ոստիկանության կողմից կատարվել են օրենքով նախատեսված բոլոր կանխարգելիչ աշխատանքները. Օսիպյան

Ոստիկանության կողմից կատարվել են օրենքով նախատեսված բոլոր կանխարգելիչ աշխատանքները: Այս մասին ընտրատեղամասում ասաց ՀՀ ոստիկանապետ Վալերիյ Օսիպյանը: «Կարծում եմ՝ շատ լավ են իրականացվել այդ աշխատանքները: Համեմատական կարգով նախորդ ընտրությունների հետ՝ ասեմ, որ նախադեպ չունեցող քարոզարշավ է տեղի ունեցել, ինքներդ էլ կարող եք փաստել, որ տեղի չեն ունեցել որևէ արտառոց դեպքեր: Իրականացվել են օրենքով նախատեսված բոլոր միջոցառումները»,-նշեց Օսիպյանը:

Նրա խոսքով՝ երբ ինքն այցելեց Արագածոտնի մարզ, այնուհետև Շիրակի մարզ, որոշ քաղաքական ուժեր փորձեցին դա քաղաքականացնել: Քաղաքական ուժերի թեկնածուների հետ հանդիպելը եղել է իր նախաձեռնությունը: Հանդիպումները տեղի են ունեցել կանխարգելիչ աշխատանքներ շրջանակներում:

«Բոլորս էինք մտահոգված, որպեսզի ունենանք լավ ընտրություններ»,-ասաց Օսիպյանը՝ որպես օրինակ բերելով Երևանի ավագանու ընտրությունները:

Անդրադառնալով Սերժ Սարգսյանի եղբորորդուն՝ Նարեկ Սարգսյանին առնչվող հարցին՝ Օսիպյանը նշեց, որ նրան դեռ Հայաստան չեն տեղափոխել: ՀՀ գլխավոր դատախազությունը նախապատրաստում է փաստաթղթերը:

«Կարևորը ձերբակալությունն է, ինքը ձերբակալված է Պրահայում՝ Չեխիայի Հանրապետությունում և կարտահանձնվի Հայաստանին», – ասաց նա։

 

Այս թեմայով
am